Átján hundruð milljónir í einum lottópotti

Það stefnir í að aðalvinningurinn í Víkingalottóinu á miðvikudaginn kemur verði sá næststærsti sem spilað hefur verið um frá því að Víkingalottóið hóf göngu sína hér á landi.

Aðalpotturinn stefnir í 170 milljónir en ofurpotturinn í 1.630 milljónir. Ef ofurtalan verður ein af aðaltölunum ætti vinningurinn því að nema um 1.800 milljónum íslenskra króna.

Stærsti pottur sem spilað hefur verið um hér á landi var 6. apríl í fyrra en hann nam um 2,3 milljörðum króna. Þar af var ofurpotturinn um 2,1 milljarður.

Þá hafði ofurpotturinn ekki gengið út í 24 vikur en nú hefur hann ekki gengið út í 23 vikur.

Samkvæmt Íslenskri getspá má búast við að ofurtalan komi upp sex til átta sinnum á ári.

„Íslendingar hafa alltaf verið stórpottasækin þjóð. Þegar potturinn er stór seljum við fleiri miða,“ segir Stefán Konráðsson, framkvæmdastjóri Íslenskrar getspár.

Líkurnar á að vinna fyrsta vinning í Víkingalottóinu er 1 á móti 12.271.512.

Algengustu tölurnar í Víkingalottóinu eru 41, sem hefur komið upp oftast eða 150 sinnum, talan 2 sem hefur komið upp 145 sinnum og 27 sem hefur komið upp 140 sinnum.

- kh