Dælingin gæti flýtt fyrir stærri skjálftum

Að sögn Jónasar Ketilssonar, jarðhitasérfræðings hjá Orkustofnun, eru allar líkur á því að það dragi úr smáskjálftavirkni á Hengilsvæðinu eftir því sem niðurdæling Orkuveitunnar á vatni stendur lengur.

Í gær höfðu mælst um 1.900 smáskjálftar á Hengilsvæðinu frá því hrina hófst 8. september í kjölfar þess að niðurdæling á vatni frá Hellisheiðarvirkjun hófst. Í minnisblaði Orkustofnunar segir að vegna smáskjálftanna hafi þrýstingur hækkað í mæliholum. Hann fari enn aðeins hækkandi en muni ná jafnvægi með tímanum og smáskjálftavirknin sem tengist niðurdælingunni þá hætta að mestu.

„Spenna af völdum jarðskorpuhreyfinga mun þó halda áfram að byggjast upp og losna úr læðingi með jarðskjálftum af og til. Þeir jarðskjálftar munu hugsanlega verða fleiri og minni en hefði orðið án niðurdælingar,“ segir Orkustofnun, sem kveður mestu skjálfta á Hengilsvæðinu ekki geta orðið meiri en um 6 á Richter kvarða.

„Niðurstaða Orkustofnunar er að sérfræðingar á þessu sviði geta sagt með nokkru öryggi að niðurdæling auki ekki líkur á því að stærri jarðskjálftar en þeir sem verða án niðurdælingar geti myndast á svæðinu. Hins vegar gætu staðbundnar tilfærslur á spennum haft áhrif í þá átt að flýta stærri skjálftum sem eru í aðsigi.“

Á laugardag fundu Hvergerðingar vel fyrir skjálftum upp á 3,8 og 3,7 stig. Aldís Hafsteinsdóttir bæjarstjóri sagði við Vísi að ólíðandi væri að búa við manngerða jarðskjálfta. Fulltrúar Orkustofnunar og Orkuveitunnar bjóða Hvergerðingum fund um málið á Hótel Örk í kvöld. - gar