Auður banka fari til þjóðar

Jóhanna Sigurðardóttir sagði í stefnuræðu sinni í gær að ríkisstjórnin teldi að bankarnir þyrftu að leggja meira af mörkum til samfélagsins og uppgjör þeirra sýndi að þeir væru aflögufærir.

„Á sama tíma og heimilin, fyrirtækin og velferðarþjónustan búa við samdrátt í kjölfar hruns fjármálakerfisins er það samfélagsleg skylda bankanna að skila þessum mikla hagnaði aftur til samfélagsins með einhverjum hætti.“ Jóhanna sagði bankana hljóta að hugsa sinn gang, þeir hefðu á síðustu árum og jafnvel áratugum fyrir hrun sagt sig úr siðferðilegu sambandi við þjóðina.

Bjarni Benediktsson, formaður Sjálfstæðisflokksins, gagnrýndi í ræðu sinni að ítrekað væri sagt við fólk að öllu svigrúmi bankanna til skuldaleiðréttingar hefði verið ráðstafað og jafnvel rúmlega það. „En næsta dag berast svo fréttir af feiknarlegum hagnaði fjármálafyrirtækjanna. Er von að slíkt valdi ólgu og vonbrigðum?“

Steingrímur J. Sigfússon fjármálaráðherra greip þetta á lofti og sagðist vonast til þess að Bjarni styddi tillögu um nýjan bankaskatt, fyrst þessi væri skoðun hans. Steingrímur sagði mikilsverðan árangur hafa náðst í efnahagsmálum sem hefði vakið athygli út fyrir landsteinana. Hann hvatti þá sem gagnrýndu ríkisstjórnina til að viðurkenna þó það sem vel væri gert.

Af nógu væri að taka af gagnrýnisefnum en þeir sem ýttu bara undir sundurlyndi gerðu umræðunni ekkert gagn.

Sigmundur Davíð Gunnlaugsson, formaður Framsóknarflokksins, sagði skýrslu fjármálaráðuneytisins um endurreisn bankanna sýna að meðvituð ákvörðun hefði verið tekin um að afskrifa minna af lánum almennings en tilefni hefði verið til. Erlendir kröfuhafar hefðu notið ávaxtanna, en ekki heimilin.

„Það svigrúm sem hefði átt að nýta til að færa niður skuldir heimilanna er nú þess í stað fært sem milljarða hagnaður í bókum bankanna og fer að lokum út úr þeim sem arður til erlendra vogunarsjóða.“

Margrét Tryggvadóttir, þingmaður Hreyfingarinnar, sagði banka hvorki hafa samvisku né siðferðiskennd og ekki skila fé til baka nema tilneyddir. kolbeinn@frettabladid.is