Stjörnurnar mæta í konunglega brúðkaupið í Mónakó

Áhugamenn um kóngafólk og stjörnur úr Hollywood eiga annasama helgi framundan þegar Albert fursti af Mónakó gengur að eiga Charlene Wittstock.

Á gestalista brúðkaups Alberts fursta af Mónakó og Charlene Wittstock er að finna aragrúa af frægum nöfnum. Albert er þekktur fyrir að vera vel tengdur inn í Hollywood-heiminn og bíða því margir í eftirvæntingu eftir að sjá hvaða fræga fólk á eftir að heiðra brúðhjónin með nærveru sinni.

Ríkissjónvarpið ætlar einmitt að sýna beint frá brúðkaupinu á laugardaginn milli klukkan 14.50 og 17.05 þar sem Elísabet Brekkan lýsir því sem fyrir augu ber.

Á gestalistanum, sem var gerður opinber í gær, er að finna fyrrum ofurfyrirsætuna Naomi Campbell en hún er fyrrverandi kærasta Alberts. Kollegi hennar Karolina Kurkova mætir líka og fatahönnuðirnir Roberto Cavalli, Karl Lagerfeld og Giorgio Armani eru líka á listanum en Armani hannar brúðarkjól Wittstock.

Nöfn spænsku og sænsku konungshjónanna ásamt Viktoríu krónprinsessu er að finna á listanum en ekki er staðfest hvort þau mæti. Forseti Frakklands Nicolas Sarkozy og ólétta eiginkonan hans, Carla Bruni, koma. Hollywood-leikararnir Gerard Butler, Mel Gibson og Roger Moore mæta ásamt Ashton Kutcher og Demi Moore en þau voru viðstödd gæsaveislu Wittstock.

alfrun@frettabladid.is