Áreynslulaus nafnaleikur

Fyrsta plata Péturs Ben og Ebergs nefnist Numbers Game. Þar blanda þeir félagar saman poppi, rokki og elektróník á aðgengilegan og fagmannlegan hátt.

Pétur Ben og Einar Tönsberg, öðru nafni Eberg, hafa sent frá sér plötuna Numbers Game. Tónlistin er einhvers konar blanda af poppi, rokki og elektróník.

„Þessi plata kom mjög áreynslulaust. Það var mjög auðvelt að semja hana," segir Pétur, sem er hæstánægður með samstarfið við Eberg.

Þeir hafa hvor um sig verið áberandi í íslensku tónlistarlífi og hugsuðu margir sér gott til glóðarinnar þegar fregnir bárust af samstarfinu. Pétur gaf út sólóplötuna Wine For My Weakness árið 2006. Síðan þá hefur hann haft í nógu að snúast, unnið með Mugison, samið kvikmyndatónlist við Bjarnfreðarson og Foreldra og tekið upp plötur fyrir Bubba og Ellen Kristjánsdóttur. Eberg hefur gefið út þrjár sólóplötur, átt lög í erlendum auglýsingum og er annar hluti dúettsins vinsæla Feldbergs.

Þeir félagar kynntust árið 2005 eftir að Einar flutti heim frá Bretlandi. „Við kynntumst í lengsta „sándtékki" sögunnar á Iceland Airwaves," segir Pétur og hlær. „Við vorum að spila á sama tíma og José Gonzáles. Hann var þarna einn með gítar og tók sér góðan tíma í að fá hljóð á hann." Þeir ákváðu að einn góðan veðurdag skyldu þeir vinna saman og það tækifæri kom þegar Pétur var beðinn um að velja með sér listamann fyrir ótilgreint verkefni. „Ég valdi að tala við hann og það gekk rosalega vel. Við ákváðum að þetta skyldi ekki vera endirinn á okkar samstarfi og vildum reyna að gera EP-plötu eða stóra plötu. Svo varð ekkert úr þessu verkefni en platan er til," segir hann og segist vel geta hugsað sér að vinna aftur með Eberg.

Ýmsir góðkunnir gestir skjóta upp kollinum á Numbers Game og má þar nefna Mugison, Sigtrygg Baldursson, Nóa úr Leaves, Gísla Galdur og þær Maríu og Hildi úr Amiinu. Á plötunni er meðal annars hið vinsæla lag Come On Come Over sem flestir ættu að þekkja úr Nova-auglýsingum.

Fram undan hjá Pétri og Eberg eru tónleikar í Tjarnarbíói 21. júlí og á Græna hattinum á Akureyri kvöldið eftir. Sjálfur er Pétur einnig að undirbúa næstu sólóplötu sína sem kemur líklega út fyrir jól.

freyr@frettabladid.is