Fara í herferð gegn munntóbaksnotkun

Stjórn Skautafélagsins Bjarnarins í Reykjavík hefur afráðið að fara í átak gegn munntóbaksnotkun á æfingum og leikjum hjá félaginu. Kannanir og sölutölur ÁTVR sýna að munntóbaksnotkun hefur verið í mikilli sókn og ekki síst meðal íþróttaiðkenda.

Stefán Örn Þórisson, stjórnarmeðlimur í íshokkídeild Bjarnarins, segir að fyrst og fremst sé hugsað um forvarnagildi þessara aðgerða. Ungir iðkendur innan raða Bjarnarins, bæði í íshokkíi og listdansi, skipti hundruðum. „Við höfum rætt þessi mál mikið að undanförnu, en nú er kominn tími til að láta verkin tala."

Stefán segir að á næstu dögum verði send út skilaboð til iðkenda félagsins og annarra liða um að tóbaksnotkun verði bönnuð á heimavelli Bjarnarins í Egilshöll. Gildir bannið jafnt um iðkendur sem og áhorfendur, en Stefán segir að fólki verði vísað frá hafi það tóbak í vörinni.

Stefán tekur fram að hann telji ekki að notkun sé meiri eða minni hjá leikmönnum Bjarnarins en öðrum liðum. „Þetta er hins vegar afar hvimleiður ósiður hjá mörgum og það er mikill misskilningur í gangi um að þetta sé eitthvað skárra en annars konar tóbaksnotkun."

Með þessu átaki vill stjórn Bjarnarins leggja sitt af mörkum fyrir yngri iðkendur, enda þurfi ekki að fjölyrða um hversu sterkar fyrirmyndir meistaraflokksmenn eru fyrir krakkana.

„Við erum með öflugt barna- og unglingastarf sem við erum að hlúa að og þetta átak er hluti af því. Þátttaka í íþróttafélögum er hluti af uppeldi barna og unglinga og mér finnst við ekki geta skilað af okkur krökkum án þess að okkar boðskapur í þessum málum hafi komið skýrt fram," segir Stefán sem bætir þó við því að hann búist fastlega við því að átakið muni mæta einhverri mótspyrnu.

„Þetta verður mögulega umdeilt, en ég ber fullt traust til okkar leikmanna að þeir hafi þroska til að átta sig á þýðingu málsins og vinni með okkur að þessu marki. Endaniðurstaðan er engu að síður sú að tóbaksnotkun er ekki leyfileg í okkar húsi."

thorgils@frettabladid.is