Stundum fullt í Laugardalnum

Hugmynd um sérstakan húsbílagarð í Reykjavík hefur verið rædd innan kerfisins en ekki hefur verið unnið neitt frekar með hana, að sögn Hrólfs Jónssonar, sviðstjóra framkvæmda- og eignasviðs borgarinnar.

„Svona framkvæmd skapar ekki bara störf á meðan á henni stendur, heldur gæti hún hugsanlega skapað tvö til þrjú störf til framtíðar,“ segir Hrólfur.

Á tjaldstæðinu í Laugardal geta 48 húsbílar fengið rafmagn samtímis, að því er Markús Einarsson, framkvæmdastjóri Farfugla, greinir frá. ,,Það koma dagar þegar allt er fullt en við getum gert ráð fyrir að við sinnum þessu vel 80 prósent af dögunum.“

Flestir húsbílagestanna eru útlendingar eða 80 til 90 prósent. ,,Íslendingar hafa farið á Vífilsstaðatúnið. Það er rólegra þar.“

Aðstöðunni til losunar úrgangs á tjaldstæðinu í Laugardal var lokað þegar borgin kom upp slíkri aðstöðu í Sundahöfn. ,,Það var orðið töluvert um að Íslendingar kæmu í helgarlok og vildu fá að losa sig við úrganginn hjá okkur áður en borgin kom upp aðstöðunni í Sundahöfn.“- ibs