Tveir fíkniefnasalar ákærðir

Lögreglustjórinn á Akureyri hefur ákært tvo menn fyrir fíkniefnakaup og -sölu.

Mennirnir eru báðir rúmlega tvítugir. Öðrum þeirra er gefið að sök að hafa í lok ágúst eða byrjun september 2010 keypt um 25 grömm af maríjúana í Reykjavík og flutt það til Akureyrar, þar sem hann seldi hluta þess til einstaklinga.

Þá eru mennirnir ákærðir fyrir að hafa í sameiningu í nóvembermánuði 2010 keypt um 150 grömm af maríjúana af óþekktum einstaklingum á Akureyri og selt um 120 grömm af þeim efnum til fólks í bænum, sem ekki er vitað um deili á.

Loks eru báðir mennirnir ákærðir fyrir að hafa í sameiningu 1. desember 2010, keypt og fengið afhent rúmlega 100 grömm af marijúana og verið búnir að selja um 20 til 30 grömm af efninu, þegar lögreglan gerði húsleit hjá þeim á dvalarstað þeirra á Akureyri, þann sama dag. Lögreglan lagði hald á afgang efnisins, 90,39 grömm af maríhúana og 1,71 grömm af tóbaksblönduðu kannabisefni.- jss