Kæra bæinn fyrir að hygla heimamönnum

„Ég vísa ásökunum um fyrirgreiðslupólitík og spillingu á bug,“ segir Eiríkur Björn Björgvinsson, bæjarstjóri á Akureyri, um ásakanir Jóns Ármanns Steinssonar forsvarsmanns byggingarverktakans Hamarsfells.

Hamarsfell ehf. og Adakris UAB undirbúa skaðabótamál á hendur Akureyrarbæ þar sem bærinn hafnaði tilboði verktakanna í byggingu Naustaskóla, nýs grunnskóla á Akureyri. Tilboð SS Byggis varð ofan á.

Þegar tilboðin voru opnuð áttu Hamarsfell og Adakris lægsta tilboðið í verkið. SS Byggir ehf., félag heimamanna, átti þá 4. og 5. lægsta tilboðið. Vegna samlagningarvillu í útreikningi á tilboði SS Byggis upp á 83,8 milljónir króna var það leiðrétt og varð þá næstlægsta tilboðið í verkið.

„Villurnar eru eitthvert aukaatriði í þessu máli. Vafamálið snýr að Hamarsfelli. Að mati Fasteigna Akureyrar uppfyllir fyrirtækið ekki skilyrði bæjarfélagsins,“ segir Eiríkur Björn.

Hamarsfell bað um skýringar á samlagningarvillunni en Akureyrarbær ber fyrir sig trúnaði.

„Siðblindan í þessu er sú að bærinn getur leiðrétt það sem honum sýnist og þarf aldrei að sýna fram á neitt,“ segir Jón Ármann hjá Hamarsfelli. „Þetta tilboð frá SS Byggi er steypa frá upphafi til enda.“

Jón Ármann bendir á að við skoðun á tilboði SS Byggis áætlar bæjarfélagið að endurgreiða verktakanum 65 milljónir króna. Vegur vinnuþátturinn af heildarupphæðinni 70 prósent og efniskostnaður 30 prósent í tilboði SS Byggis. Hamarsfell bendir á að eðlileg hlutföll í þessu samhengi séu 40 prósent í vinnukostnað og 60 prósent í efniskostnað. „Þetta er mjög ótrúverðug upphæð,“ segir Jón Ármann og segir að Hamarsfell hafi bent á ótrúverðugleika upphæðarinnar. „Við fengum lögbann á áframhaldandi samninga bæjarins við SS Byggi en tryggingargjaldið til að viðhalda því er 66 milljónir króna.“

Hamarsfell ætlar ekki að borga trygginguna. Það sé annaðhvort að kæra „eða bara lúffa gegn því sem við teljum venslaspillingu á versta stigi,“ segir Jón Ármann. „Akureyri og SS Byggir ganga því vafalaust frá samningi eftir klukkan tvö á morgun [í dag].“ Hamarsfell ætlar að kæra málið og verður það tekið fyrir í útboðsnefnd kærumála hjá innanríkisráðuneytinu.  birgirh@frettabladid.is