Höll Jóhannesar í Bónus metin á hátt í 200 milljónir

„Það er flott að sitja þarna inni og njóta útsýnisins," segir Fanney Hauksdóttir, arkitektinn á bak við glæsihýsið Sunnuhvál, sem var áður í eigu auðmannsins Jóhannesar Jónssonar.

Skilanefnd Landsbankans leysti húsið til sín í desember á síðasta ári og setti á sölu í gær.

Fjórar fasteignasölur sjá um að koma eigninni í verð, en ekki er gefið upp hvað skilanefndin hyggst fá fyrir húsið. Heimildir Fréttablaðsins innan fasteignasölubransans herma að 180 til 190 milljónir ættu að fást fyrir húsið og fasteignasalarnir sem talað var við eru sammála um að eignin sé ein sú glæsilegasta sem er í boði á landinu í dag. Húsið er samtals um 427 fermetrar og stendur á rúmlega eins hektara jörð.

Aðspurð hvort húsið sé það glæsilegasta sem Fanney hefur hannað á ferli sínum, sem spannar tuttugu ár, segir hún að það sé einstakt að mörgu leyti. „Það var mikið lagt í húsið. Mikill metnaður."

Ekkert var til sparað við byggingu hússins og samkvæmt heimildum Fréttablaðsins var kostnaðurinn hátt í 400 milljónir. Húsið er á tveimur hæðum og á efri hæðinni mynda stofan, borðstofan og eldhúsið eitt stórt og opið rými. Gólfsíðir útsýnisgluggar eru í stofunni ásamt arni. Á neðri hæðinni má meðal annars finna tæknirými, líkamsræktaraðstöðu og tvö baðherbergi. Fyrir utan er 40 fermetra sundlaug og stór heitur pottur.

Útsýnið úr húsinu er stórkostlegt og Fanney segir að umhverfið hafi verið notað mikið við hönnunina. „Þú upplifir náttúruna og hvernig úti og inni rennur saman," segir hún. „Það var stórt atriði í hönnuninni að tengja hana náttúrunni. Þetta var mjög skemmtilegt verkefni. Það unnu allir saman og vel."

En er ekki langt þangað til annað eins verkefni kemur á borð arkitekta á Íslandi?

„Það hefur margt breyst og það eru aðrar áherslur í dag," segir Fanney, en bætir við að í grunninn séu markmiðin ávallt þau sömu. „Maður reynir að láta notkunina og stemninguna endurspeglast í arkitektúrnum."atlifannar@frettabladid.is