Who Knew á Hróarskeldu

Sumarið er tími tónlistarhátíðanna og það vita strákarnir í hljómsveitinni Who Knew. Þeir koma fram víða í Evrópu í sumar þar á meðal á Hróarskelduhátíðinni víðfrægu.

 

„Þegar ég stóð þarna á Hróarskeldu og horfði á þessar brjálæðislega stóru hljómsveitir spila, þá hugsaði ég hversu gaman það væri að fá að taka í hljóðfærin fyrir framan allt þetta lið,“ segir Hilmir Berg Ragnarsson, hljómborðsleikari hljómsveitarinnar Who Knew.

Who Knew hefur bæst við listann yfir hljómsveitirnar sem koma fram á Hróarskelduhátíðinni í Danmörku í sumar. Eins og fram kom í Fréttablaðinu í vikunni kemur hljómsveitin Agent Fresco einnig fram á hátíðinni, en óvíst er hvort fleiri íslenskar hljómsveitir bætast við. Who Knew kemur fram á Pavillion Junior, sama sviði og Agent Fresco.

 

„Við eigum allir brjálæðislega góðar minningar frá þessari hátíð; að upplifa fyrsta frelsið sem unglingur og fara til útlanda, drekka sig blindfullan í landi þar sem það má – vera eins og vitleysingur í tjaldi í viku og koma heim drulluskítugur og reynslunni ríkari,“ segir Hilmir.

 

Who Knew kemur einnig fram á fjölmörgum öðrum hátíðum í Evrópu í sumar. Hljómsveitin kemur meðal annars við í Þýskalandi, Sviss, Frakklandi og Austurríki. „Sumarið er svolítið pakkað hjá okkur, en við vildum ekki vera í allt sumar úti. Þannig að við sögðum nei við einhverju,“ segir Hilmir. „Meirihlutinn er litlar hátíðir, líkt og Airwaves.“

 

Who Knew eyddi stórum hluta síðasta sumars í Berlín og kom fram víða í Evrópu. Á þessum ferðalögum kynntust meðlimir hljómsveitarinnar ýmsum kynlegum kvistum. „Brjáluðu aðdáendurnir krydda þetta svolítið,“ segir Hilmir. „Ákveðin týpa af fólki fer yfir þessi kunningjamörk frekar fljótt og bætir manni við sem vini á Facebook og sendir póst vikulega. Þetta er fólk sem við hittum kannski í tíu mínútur á Ítalíu. Þetta er rosalega fyndið. Allir í hljómsveitinni eiga einn eða tvo sem hafa stöðugt samband. En það er skrítið að tala um klikkaða aðdáendur. Þetta er bara fólk sem tók það að fíla hljómsveitina skrefi lengra.“

 

Who Knew kemur fram á Græna hattinum á Akureyri í kvöld ásamt hljómsveitunum Cliff Clavin og Agent Fresco.

 

atlifannar@frettabladid.is