Natalie Portman sögð hafa dansað lítið í Black Swan

Ballerínan Sarah Lane, sem var dansstaðgengill Natalie Portman í Black Swan, segir Portman lítið hafa dansað í myndinni. Hún steig fram eftir að unnusti Portman eignaði henni stærstan hluta dansatriðanna.

Natalie Portman fékk í febrúar Óskarsverðlaunin fyrir hlutverk sitt í kvikmyndinni Black Swan. Eftir að hún fékk verðlaunin virtu spruttu upp vangaveltur um meinta danshæfileika leikkonunnar, sem eru sagðir ótrúlegir miðað við að hún hafði aðeins eitt og hálft ár til að undirbúa sig fyrir myndina. Danshöfundurinn Benjamin Millepied, unnusti Portman sem starfaði á tökustað Black Swan, sagði í viðtal við dagblaðið Los Angeles Times á dögunum að Portman hafi sjálf framkvæmt um 85 prósent af dansporunum í myndinni.

Nú hefur ballerínan Sarah Lane stigið fram og fullyrt að Portman framkvæmi aðeins fimm prósent danssporanna í myndinni. Þá segir hún lítið gert úr ballettlistinni með því að segja að leikkona sem hefur rúmt ár til að undirbúa sig geti orðið jafn góð ballerína og sést í Black Swan. "Skotin sem sýna aðeins andlit hennar og hendur eru hún í raun og veru," sagði Lane í viðtali við Entertainment Weekly. "En þau sýna ekki raunverulegan dans."

Lane sakar Ari Handel, framleiðanda Black Swan, um að segja henni að tala ekki um vinnu sína við fjölmiðla, jafnvel þó ekkert slíkt hafi komið fram í samningi sem gerður var við hana. "Þau vildu skapa hugmynd í höfði fólks um að Natalie væri einhvers konar undur - svo hæfileikaríkur dansari að eitt og hálft ár væri nóg til að gera hana að ballerínu. Þetta var gert útaf Óskarsverðlaununum," segir Lane. "En það er ekki bara móðgun við mig heldur alla stéttina. Ég er búin að vera að dansa í 22 ár."

Eftir að Sara Lane steig fram sendi framleiðslufyrirtækið Fox Searchlight frá sér yfirlýsingu þess efnis að stærstur hluti dansatriðanna í Black Swan sé Portman sjálf að dansa.

atlifannar@frettabladid.is