Stærðfræði-doktor með tónleika á Nasa

Kanadíski tónlistarmaðurinn og stærðfræðingurinn Caribou stígur á svið á Nasa sunnudaginn 22. maí ásamt hljómsveit sinni. Sin Fang, sem gaf út sína aðra sólóplötu á dögunum, hitar upp.

Caribou er sviðsnafn Daniels Victors Snaith sem er einnig þekktur undir nafninu Manitoba. Hann breytti nafninu úr Manitoba í Caribou árið 2004 þegar honum var hótað lögsókn. Daniel Victor Snaith lærði stærðfræði í borginni Toronto og lauk doktorsgráðu í faginu í London þar sem hann er búsettur. Faðir hans, Victor Snaith, er prófessor í stærðfræði við háskólann í Sheffield á Englandi og hefur Daniel því ekki langt að sækja stærðfræðigáfu sína.

Hróður Caribou hefur aukist síðustu ár og hlaut platan Andorra kanadísku Polaris-tónlistarverðlaunin. Einnig var platan Swim tilnefnd til verðlaunanna.

Erfitt er að skilgreina tónlist Caribou með einu orði enda eru verk hans fjölbreytileg. Swim er þannig undir sterkum áhrifum klúbbatónlistar. Nasa Bono ehf. stendur fyrir tónleikunum og er miðasala hafin á Midi.is.