Apatow gæti bjargað Megan Fox

Grínleikstjórinn Judd Apatow kann þá list að kitla hláturtaugar hins vestræna heims með kvikmyndum á borð við The 40 Year Old Virgin og Knocked Up. Og nú er leikstjórinn byrjaður á nýrri mynd. Ekkert hefur verið gefið út hver söguþráðurinn er en vefmiðlar hafa gert að því skóna að gifta parið úr Knocked Up, þau Paul Rudd og Leslie Mann, verði í aðalhlutverkum að þessu sinni. Apatow hefur haldið mikilli tryggð við sína leikara en samkvæmt Empire Online gæti hann leitað út fyrir þann hóp því sögusagnir eru á kreiki um að Megan Fox kunni að fá hlutverk í myndinni.

Megan Fox sló eftirminnilega í gegn í kvikmyndinni Transformers 1 og 2 og virtist ætla að leggja heiminn að fótum sér. Hún lenti síðan upp á kant við leikstjórann Michael Bay og var hent út á götu. Fox taldi sig hafa ýmislegt annað til brunns að bera en að vera sæt í kringum vélmenni og ætlaði að nýta vinsældir sínar með kvikmyndinni Jonah Hex. Henni var slátrað af öllum og ekki berast betri fréttir af næstu kvikmynd hennar, Passion Play, því hún fer víst beint á DVD.

Fox gæti því vel þegið smá hjálp við að endurreisa annars stuttan feril.