Amazon gefur út bækur Viktors Arnars

„Þetta kom mér mjög á óvart,“ segir rithöfundurinn Viktor Arnar Ingólfsson.

Útgáfufyrirtækið Amazon Crossing, sem er í eigu bandaríska netrisans Amazon, hefur keypt útgáfuréttinn á þremur bókum Viktors Arnars. Flateyjargáta kemur út í Bandaríkjunum í haust, Engin spor í apríl á næsta ári og Afturelding í júlí sama ár. Amazon hefur einnig tryggt sér útgáfuréttinn á Galdri, skáldsögu Vilborgar Davíðsdóttur.

„Maður hefur litið þannig á að Bandaríkjamarkaður væri óvinnandi vígi og það tæki því ekki að streða við að komast þangað en þarna er alveg nýr vinkill á útgáfu sem er gaman að skuli vera kominn til,“ segir Viktor Arnar.

Fréttablaðið greindi frá því á dögunum að Amazon Crossing ætlaði að gefa út tíu bækur eftir tíu íslenska höfunda bæði í prentuðu og Kindle-rafbókarformi í tilefni af heiðurssessi Íslands á bókamessunni í Frankfurt í haust. Nú er ljóst að bækurnar verða fleiri en tíu og eru það góð tíðindi fyrir íslenskar bókmenntir.

Með því að gera þriggja bóka samning við Viktor sýnir fyrirtækið að það ætlar ekki að tjalda til einnar nætur í samstarfinu við Ísland. Eitt lykilatriðið í vali Amazon á bókum Viktors og Vilborgar eru umsagnir lesenda á heimasíðum þess í mismunandi löndum. Fyrrgreindar bækur þeirra eiga það einmitt sammerkt að hafa hlotið frábærar umsagnir á þýsku Amazon-síðunni en þar í landi hafa bækur Viktors selst í um 150 þúsund eintökum.

Aðspurður segist hann ekki fá fúlgur fjár fyrir samninginn við Amazon Crossing, enda séu rithöfundar yfirleitt láglaunafólk. Heiðurinn sé fyrst og fremst mikill. Hann býst ekki við að ferðast til Bandaríkjanna til að kynna bækurnar en mun ræða þau mál betur við starfsfólk Amazon á bókamessunni í Frankfurt í haust.- fb