Þakka Guði fyrir hvern dag sem Ozzy dregur andann

„Þetta er mjög spennandi festival," segir Sigurður Sverrisson sem verður fararstjóri í fyrstu íslensku hópferðinni á rokkhátíðina Sweden Rock Festival svo vitað sé.

Hátíðin verður haldin í tuttugasta sinn í bænum Sölvesborg í Svíþjóð í júní. Sextíu hljómsveitir stíga þar á svið á þremur dögum, þar á meðal Judas Priest, Whitesnake og Ozzy Osbourne. Einnig troða upp bönd á borð við The Cult, Accept, Down, Helloween, Thin Lizzy og Rob Zombie.

„Þetta er rosalega flott dagskrá fyrir þennan klassíska rokkhóp. Þarna eru að minnsta kosti tuttugu bönd sem ég hefði brennandi áhuga á að sjá," segir Sigurður.

Upphaflega stóð til að fara á High Voltage-rokkhátíðina í London annað árið í röð en vegna vonbrigða með dagskrána þar varð sænska hátíðin fyrir valinu.

„Judas Priest er í kveðjutúr og Ozzy er væntanlega að hætta bráðum. Maður þakkar Guði fyrir hvern dag sem hann dregur andann," segir Sigurður og er sannfærður um að hátíðin verði ógleymanleg fyrir íslenska rokkhunda.

Gist verður á tjaldsvæði hátíðarinnar og eru 25 flugsæti í boði. Áhugasamir geta kíkt á heimasíðu ÍT ferða.

- fb