Safna fé fyrir fórnarlömb

Fjöldi tónlistarmanna og hljómsveita um heim allan ætlar að láta gott af sér leiða vegna hamfaranna í Japan.

Rokkararnir í Iron Maiden ætla að selja stuttermaboli til að safna fé handa fórnarlömbunum. Hljómsveitin var á leiðinni til Tókýó þegar jarðskjálfti upp á 9 á Richter skók landið og þurfti hún að halda til borgarinnar Nagoya í staðinn. Eins og gefur að skilja var báðum tónleikunum í Tókýó aflýst. Rokkararnir í Linkin Park hafa ákveðið að fara að dæmi Maiden og selja einnig sérhannaða boli til styrktar fórnarlömbunum.

Lady Gaga hefur þegar náð að selja armbönd til styrktar Japönum fyrir tæpar þrjátíu milljónir króna og hefur óskað eftir uppástungum á Twitter um fleiri söfnunarverkefni.

Rokkararnir í Foo Fighters hafa ákveðið að halda tónleika á Nýja-Sjálandi til styrktar fórnarlömbunum, auk þess sem Bryan Adams vill að stórir góðgerðatónleikar verði haldnir með mörgum flytjendum, í anda Live Aid. Á meðal annarra sem hafa látið gott af sér leiða vegna hörmunganna eru Lou Reed, Sonic Youth, Katy Perry, Yoko Ono og sonur hennar Sean Lennon.