Tölvunirðir heyja einvígi í skák og boxi

„Ég fer óhræddur í þennan bardaga," segir Björn Jónsson. Tveir starfsmenn í þrívíddarteymi tölvuleikjafyrirtækisins CCP, þeir Björn og Daníel Þórðarson, ætla að keppa í skákhnefaleikum í Laugardalshöll næstkomandi föstudag, 25. mars, á Fanfest-aðdáendahátíð tölvuleiksins EVE online. Hið áhugaverða er að Björn er með 2039 Elo-stig en hefur aldrei keppt í hnefaleikum en Daníel varð Íslandsmeistari í hnefaleikum árið 2009 en er aftur á móti með engin Elo-stig.

„Ég lít á þetta þannig að ég held að hann sé verri í skák en ég í boxi. Það er ljóst að við eigum okkar sterku greinar. Það er bara spurning hvor verður flinkari að verjast í því sem hann er slakur í," segir Björn og ætlar ekkert að gefa eftir.

Keppt er í lotum og er byrjað á skáklotu í fjórar mínútur. Tekin er einnar mínútu hvíld á milli og síðan hefst hnefaleikalota í þrjár mínútur. Loturnar ganga svo á víxl þar til annað hvort mátað er í skákinni eða slegið rothögg í hringnum. Frítt verður inn í Laugardalshöll auk þess sem aðdáendur EVE online geta fylgst með skákboxinu í beinni útsendingu á netinu.

CCP safnar 500 króna áheitum vegna keppninnar og rennur allur ágóðinn til samtakanna Sjónarhóls. Hægt er að heita á Björn í síma 900-9201 og á Daníel í síma 900-9202.

freyr@frettabladid.is