Natalie og balletdansarinn ósammála um búsetu

Natalie Portman og unnusti hennar, balletdansarinn Benjamin Millepied, eru ekki sammála um hvar eigi að ala upp ófætt barn þeirra. Að sögn In Touch Weekly vill Portman ala barnið upp í París, heimaborg Millepied, en hann vill búa í New York.

„Ferill hans er loksins kominn á flug og þess vegna vill hann búa áfram í New York næstu árin," var haft eftir innanbúðarmanni. Portman vill aftur á móti taka sér frí frá kvikmyndaleik og sinna barnauppeldinu í friði og ró.

„Hún hefur sagt Benjamin að hún vilji ekki ala barnið upp í nálægð við kvikmyndabransann heldur vilji hún flytja til Parísar þar sem þau fá frið frá ágangi ljósmyndara."