Semja lag í beinni útsendingu

Bandaríska hljómsveitin Maroon 5 ætlar að koma sér fyrir í hljóðveri 22. mars og semja frá grunni nýtt lag á einum sólarhring. Viðburðurinn verður í beinni útsendingu á netinu og getur fólk um allan heim því fylgst með lagasmíðinni.

Hljómsveitin hefur beðið aðdáendur sína um að taka þátt í að semja lagið með því að senda inn athugasemdir, texta og hugmyndir sem verður varpað á einn vegg í hljóðverinu. Afraksturinn fer beint á næstu plötu sveitarinnar.

Þessi viðburður er hluti af nýrri tónlistaráætlun drykkjarframleiðandans Coca-Cola sem miðar að því að gefa ungmennum kost á að kynnast tónlistarsköpun frá fyrstu hendi og sjá leiðandi listamenn í bransanum að störfum. „Lengi hefur Coca-Cola notað tónlistina til að færa fólk saman um allan heim, á viðeigandi og áhrifamikinn hátt," segir JoeBelliotti hjá Coca-Cola. „Okkur finnst spennandi að vinna með Maroon 5. Þeir eiga sér áhangendur um víða veröld og hafa samið flotta tónlist."

Maroon 5 hefur sent frá sér tvær hljóðversplötur sem náðu báðar margfaldri platínusölu. Þær heita Songs About Jane sem kom út árið 2002 og It Won't Be Soon Before Long frá árinu 2007.

Hægt verður að fylgjast með upptökunum á síðunni coca-cola.com/music.