Sú besta í bransanum

Rachel Zoe þykir besti stílistinn í Hollywood um þessar mundir. Hún segir að ástæða velgengninnar sé að hún sé heltekin af starfinu.

Vikuritið Hollywood Reporter taldi saman 25 valdamestu stílista Hollywood um þessar mundir og í efsta sæti trónir stjörnustílistinn Rachel Zoe. Hún hefur meðal annars unnið með Nicole Richie, Lindsay Lohan og er núverandi stílisti leikkvenna á borð við Anne Hathaway, Jennifer Garner og Cameron Diaz.

Í viðtali við vikuritið segist Zoe hafa unnið langa vinnudaga og að hún hafi verið heltekin af tískubransanum. „Ég vann alla daga vikunnar. Ég var algjörlega heltekin af tískuiðnaðinum og eyddi öllu mínu fé í flugmiða á tískuvikuna í París. Ég svindlaði mér inn á sýningar og beið í röð eftir því að fá að sjá Marc Jacobs. Fatahönnuðir voru mínar hetjur og mínar fyrirmyndir. Það hefur í raun ekkert breyst," sagði Zoe, sem hefur með þrotlausri vinnu skapað sér sess sem einn þekktasti stílisti heims.

Fast á hæla Zoe kom stílistinn Kate Young, sem hefur séð um að klæða Óskarsverðlaunahafann Natalie Portman. Þriðja sætið vermdi Petra Flannery, sem starfar sem stílisti Zoe Saldana og Emmu Stone. Á eftir henni kom Jen Rade, sem á heiðurinn að klæðaburði Angelinu Jolie og söngkvennanna Pink og Cher. Ástæðan fyrir því að Rade situr svo hátt á listanum er líklega sú að konurnar sem hún klæðir eru á meðal þeirra kvenna sem mest eru myndaðar á rauða dreglinum því þessar konur eru sjaldan taldar sérstaklega smekklegar þegar kemur að klæðavali.