Helga Lilja á tískuvikunni í New York

Fatahönnuðurinn Helga Lilja Magnúsdóttir tók þátt í sölusýningu í tengslum við tískuvikuna í New York sem fram fór í febrúarlok. Þar frumsýndi hún nýja haust- og vetrarlínu sína en Helga Lilja hannar undir heitinu Helicopter.

„Ég ætlaði upphaflega að taka þátt í sölusýningu á tískuvikunni í London en það datt upp fyrir og þá ákvað ég að sækja um á tískuvikuna í New York og fékk þar inni," útskýrir Helga Lilja.

Hún segir móttökurnar hafa verið góðar og að margir hafi sýnt hönnun hennar áhuga.

„Móttökurnar voru mjög jákvæðar og ég fékk einnig nokkrar góðar umfjallanir á tískubloggum þannig þetta gekk allt rosalega vel." Haustlínan er að sögn Helgu Lilju ekki svo ólík því sem hún hefur verið að gera hingað til og inniheldur sömu stóru og þægilegu sniðin en aðra liti og meira af prjónaflíkum.

Helga Lilja stefnir á að fara aftur til New York í lok sumars þar sem hún mun sýna vorlínu næsta árs auk þess sem hún hyggst taka þátt í tískuvikunni í París í sömu erindagjörðum.

„Mér fannst ég ekki alveg nógu vel undirbúin fyrir New York-ferðina núna þar sem ég hafði lítinn undirbúningstíma. En næst ætla ég að koma fersk inn og halda áfram að kynna mig fyrir mögulegum kaupendum," segir Helga Lilja að lokum. - sm