Lara Croft aftur á hvíta tjaldið

Þriðja Tomb Raider-myndin er í undirbúningi. „Við erum mjög spennt fyrir því að vekja aftur til lífsins kvikmyndaröð sem er nú þegar orðin gríðarlega vinsæl," sagði framleiðandinn Graham King. Ekki hefur verið ákveðið hver mun leikstýra nýju myndinni og hver fer með aðalhlutverkið.

Angelina Jolie lék hetjuna Löru Croft í tveimur Tomb Raider-myndum sem komu út í byrjun síðasta áratugar. Hvorugar fengu þær góða dóma gagnrýnenda en aðsóknin var engu að síður prýðileg. Fyrri myndin, Lara Croft: Tomb Raider, er tekjuhæsta mynd allra tíma í Bandaríkjunum af þeim sem eru byggðar á tölvuleikjum. Tekjuhæsta tölvuleikjamynd allra tíma í heiminum er aftur á móti Prince of Persia: The Sands of Time sem kom út í fyrra.

Alls hafa tíu Tomb Raider-tölvuleikir verið gefnir út og kom sá fyrsti út árið 1996.