Listasafnið víkur fyrir Hörpu

Tónlistarhátíðin Iceland Airwaves verður haldin að hluta til í Hörpunni í haust. Samningur þess efnis var nýlega undirritaður. Stærstu tónleikar hátíðarinnar verða í Hörpunni, sem gerir það að verkum að Listasafn Reykavíkur, Hafnarhúsið, verður ekki á meðal tónleikastaða í ár.

Þrír salir verða notaðir í Hörpunni sem taka á bilinu 250 til 1.500 manns, allir í stæði. Með því að færa sig í yfir í Hörpuna vonast framkvæmdastjórinn Grímur Atlason til að Airwaves-hátíðin geti tekið á móti um sex þúsund manns í stað fimm þúsund eins og verið hefur.

„Við skoðuðum húsið og það eru gríðarlega miklir möguleikar þar," segir Grímur. Hann býst við mun betri hljómi en hingað til hefur þekkst á stærstu tónleikunum í Listasafninu.

„Við sáum mikla möguleika í þessum þremur sölum á að halda stóra tónleika sem myndu hljóma vel og sem fólk sæi betur. Það er hægt að koma fleirum inn í stærsta salinn en í Listasafnið og eftir að hafa legið vel yfir þessu fannst okkur þetta vera skrefið sem þyrfti að taka fyrir hátíðina. Hún er búin að vera stöðug í nokkur ár en okkur fannst gáfulegt að taka skrefið og færa hana upp á annan stall."

Í Hörpunni verður einnig eitthvað um tónleika utan dagskrár auk þess sem fjölmiðlamiðstöð hátíðarinnar verður færð þangað inn. „Airwaves kemur með yngra fólk inn í Hörpuna og ég held að allir vilji að þetta hús verði notað af fleiri hópum en þeim sem eldri eru," segir Grímur. - fb