Morrissey snýr aftur á svið

Tónlistarmaðurinn Morrissey heldur í tónleikaferðalag um Bretland í júní sem endar á því að hann verður aðalatriðið á Hop Farm tónlistarhátíðinni. Tónleikarnir verða þeir fyrstu sem Morrissey kemur fram á frá árinu 2009, en hann virðist vera að vakna úr dvala.

Útgáfurisinn EMI tilkynnti í janúar að safnplatan The Very Best of Morrissey kæmi út í apríl á þessu ári. Ólíkt mörgum öðrum slíkum plötum er þessi unnin í samstarfi við listamanninn, en útgáfufyrirtæki gefa oft út „best of"-plötur án samráðs við tónlistarmennina til að klára við þá samninga. „Best of"-plötur með The Smiths, sem Morrissey leiddi á níunda áratugnum, og Radiohead hafa til að mynda komið út í óþökk hljómsveitanna.

Morrissey velur sjálfur myndina á umslag The Very Best of Morrissey. Þá verður lagið Glamorous Glue endurhljóðblandað og gefið út meðfram plötunni ásamt tveimur b-hliðum.- afb

Hér fyrir ofan má sjá myndbandið við Glamorous Glue.