Bassaleikari Alice in Chains látinn

Mike Starr, fyrrverandi bassaleikari hljómsveitarinnar Alice in Chains, er látinn, 44 ára að aldri.

Starr fannst látinn í húsi sínu í Salt Lake City í Bandaríkjunum á þriðjudagskvöld. Lögreglumenn komu að líki Starr eftir að hafa fengið ábendingu í gegnum síma. Hvað varð honum að aldurtila liggur ekki fyrir, en hann hafði glímt við eiturlyfjafíkn í mörg ár. Hann hafði gert ýmsar ráðstafanir til að losna við fíknina og kom meðal annars fram í raunveruleikaþættinum Celebrity Rehab, eða Meðferð stjarnanna.

Starr lék á bassa á plötunni Dirt með Alice in Chains sem kom út árið 1992. Ári síðar yfirgaf hann hljómsveitina. Dirt var á meðal bestu platna hljómsveitarinnar, ef ekki sú besta.- afb

Hér fyrir ofan er myndbandið við lagið Would?, sem hljómsveitin gerði fyrir kvikmyndina Singles árið 1992. Myndbandið fékk seinna verðlaun á MTV-hátíðinni.