Óbeislaður kynþokki Þorsteins felldi Bieber

„Kynþokkinn var of mikill fyrir ungstirnið. Þessi óbeislaði, þroskaði kynþokki íslenska grínistans," segir Þorsteinn Guðmundsson, höfundur og aðalleikari gamanmyndarinnar Okkar eigin Osló.

Okkar eigin Osló var frumsýnd fyrir helgi og fór beint á topp aðsóknarlistans um helgina. Rúmlega 4.000 manns sáu myndina, sem skaut söngvaranum Justin Bieber og mynd hans Never Say Never, niður í fimmta sæti listans.

Árangurinn er áhugaverður í ljósi þess að Bieber-æði var lýst yfir í Fréttablaðinu fyrir helgi. Ungar stúlkur sem aldnar þyrptust á myndina og komu margar grátandi út eftir að hafa séð kanadíska hjartaknúsarann á hvíta tjaldinu. En lendir Þorsteinn í því að grátandi stúlkur hrópi nafn hans á götum úti?

„Ekki svo mikið, sko," segir hann og hlær. „Ég finn samt fyrir því, í fullri hreinskilni, þegar ég fer í matvöruverslanir og svona, að fólk á erfitt með að horfa í augun á mér. Það er eins og það fari alltaf að horfa á rassinn á mér eða líti á mig sem eitthvert kjötflykki. Ég er með tilfinningar. Ég er manneskja. Þetta er óþægilegt."

Þorsteinn er gríðarlega ánægður með viðtökurnar á Okkar eigin Osló, en myndin er sú fyrsta sem hann fer með aðalhlutverkið í. „Ég er bara svo feginn," segir hann. „Maður er að skila af sér verki og við fáum fínar viðtökur og fjórar stjörnur hjá flestum gagnrýnendum, sem er ekki algengt með gamanmyndir." - afb