Efron daðraði við annan karlmann

Leikarinn Zac Efron á að hafa komið öllum á óvart þegar hann sást leiða karlmann í veislu einni í Hollywood fyrir stuttu. Tímaritið The National Enquirer heldur því jafnframt fram að Efron hafi einnig daðrað duglega við manninn og það í augnsýn fyrrverandi kærustunnar, leikkonunnar Vanessu Hudgens.

„Það kom mér á óvart hversu afslappaður hann var í kringum þennan mann. Hann gekk um brosandi og hélt í hendina á honum. Menn veltu því fyrir sér hvort þetta væri sett á svið til að gera Vanessu afbrýðisama, en satt að segja virtist Zac afskaplega hrifinn af manninum,“ var haft eftir sjónarvotti. Fréttirnar ættu ekki að koma mörgum á óvart því mikið hefur verið slúðrað um kynhneigð Efrons allt frá því hann sló í gegn í dans- og söngvamyndinni High School Musical.

„Vanessa virtist lítið láta þetta á sig fá, hún og Zac heilsuðust vinalega en svo héldu þau sig hvort í sínu horni. Vanessa skemmti sér með vinkonum sínum á meðan öll athygli Zacs var á þessum manni.“