Furtado skilar Gaddafí-peningum

Nelly Furtado ætlar að gefa milljónirnar sem hún fékk fyrir að syngja fyrir fjölskyldu Líbíuleiðtogans Muammars Gaddafí.

Söngkonan Nelly Furtado hefur ákveðið að gefa peningana sem hún fékk fyrir að syngja fyrir fjölskyldu Líbíuleiðtogans Muammars Gaddafí. Furtado sagðist á Twitter-síðu sinni hafa sungið fyrir fjölskylduna á 45 mínútna einkatónleikum á ítölsku hóteli árið 2007. Hún fékk eina milljón dala fyrir sönginn, eða um 115 milljónir króna, og ætlar að gefa summuna til góðgerðarmála.

Aðrir söngvarar hafa verið undir þrýstingi um að gefa peningana sem þeir fengu fyrir sams konar einkatónleika. Á meðal þeirra eru Beyoncé og Usher. Að sögn tímaritsins Rolling Stone komu þau fram í nýársteiti Gaddafí-fjölskyldunnar á eyjunni St. Barts í Karíbahafinu árið 2009 og fengu fyrir það ótilgreinda upphæð. Maria Carey fékk einnig eina milljón dollara í vasann fyrir að syngja fyrir Muatassim, son Gaddafís, árið áður og rapparinn 50 Cent söng einnig fyrir hann á kvikmyndahátíðinni í Feneyjum 2005.

Muammar Gaddafí hefur verið fordæmdur fyrir að beita ofbeldi gegn mótmælendum í Líbíu undanfarnar vikur. Talið er að um tvö þúsund manns hafi látið lífið í átökunum. Fjöldi tónlistarmanna syngur á einkatónleikum víða um heim en margir vita ekki hver það er sem borgar brúsann. „Í níutíu prósentum tilvika hafa listamennirnir ekki hugmynd. Flestir myndu ekki syngja ef þeir vissu að það væri fyrir Gaddafí. Þeir myndu ekki hafa samvisku í það,“ sagði Buck Williams, umboðsmaður hljómsveitarinnar R.E.M.

Í góðærinu hikuðu íslenskir útrásarvíkingar ekki við að borga tónlistarmönnum stórfé fyrir að syngja fyrir sig í einkapartíum. Á meðal þeirra sem tróðu upp voru Elton John, Tom Jones og 50 Cent. Hvort þeir hafi íhugað að skila fúlgunum sem þeir fengu, til dæmis til góðgerðarmála á Íslandi, skal aftur á móti ósagt látið.

freyr@frettabladid.is