Skildu fórnarlambið eftir með alvarlegar innvortis blæðingar

Karlmaður á þrítugsaldri hefur verið útskrifaður af gjörgæsludeild Landsspítalans eftir að hafa legið þar um hríð á milli heims og helju, eftir fólskulega líkamsárás fjögurra karlmanna á hann á sunnudagskvöldið.

Greint var frá málinu í Fréttablaðinu í morgun.

Mennirnir fjórir ruddust inn í iðnaðarhúsnæði, sem þolandinn hefur til umráða og gengu þar í skrokk á honum með höggum og spörkum og skildu hann eftir stórslasaðan, meðal annars með alvarlegar innvortis blæðingar.

Að sögn Friðriks Smára Björgvinssonar yfirmanns rannsóknadeildar lögreglunnar á höfuðborgarsvæðinu virðast þeir hafa komið gagnert til að misþyrma manninum, fremur en að ósætti hafi risið af samskiptum þeirra á staðnum.

Þolandinnn var fluttur á slysadeild og um tíma var tvísýnt um líf hans vegna blæðinganna. Tveir árásarmannanna voru handteknir aðfararnótt mánudags og hinir síðar, en þeim var svo öllum sleppt að loknum yfirheyrslum í gær, en þá var búið að úrskurða tvo þeirra í gæsluvarðhald.

Að sögn Friðriks Smára þekktu árásarmennirnir þolandann ekki persónulega þótt þeir hafi talið sig eiga ótilgreindar óuppgerðar sakir við hann.

Árásarmennirnir þekkjast hinsvegar vel, en tilheyra þó ekki neinum sérstökum félagsskap. Þeir eiga allir afbrotaferil að baki, meðal annars fyrir ofbeldi.