Biskup ákærður fyrir þöggun

Dr. Fortune minntist á málþinginu á kaþólskan biskup í Kansas sem var ákærður síðastliðinn föstudag fyrir að hylma yfir presti í sókn sinni sem var með hundruð barnaklámsmynda á tölvu sinni. Biskupinn, Robert Finn, er sakaður um að hafa brugðist skyldu sinni gagnvart börnum.

Finn og samstarfsmenn hans innan kaþólsku kirkjunnar hafa lýst sig saklausa. Saksóknari á svæðinu segir í samtali við AP-fréttastofuna að biskupinn og aðrir undir hans stjórn hafi haft lagalega skyldu til að greina frá málinu. Myndirnar uppgötvuðust á tölvu prestsins í desember í fyrra en starfsmenn kirkjunnar biðu þar til í maí með að láta þær í hendur lögreglu. Verði Finn dæmdur, á hann yfir höfði sér allt að eins árs fangelsi og sekt að allt að þúsund Bandaríkjadölum, líkt og aðrir starfsmenn kirkjunnar sem vissu af myndunum.