Vekja athygli á tíðum slysum ungmenna

Fjöldi alvarlegra umferðarslysa meðal ungs fólks er kveikjan að keppninni Vertu til, sem Umferðarstofa hefur efnt til meðal framhaldsskólanema.

Slagorð keppninnar er Lifum af – fækkum banaslysum í umferðinni. Keppt er um besta vefsjónvarpsþáttinn, besta slagorðið, bestu ljósmyndina og bestu krækjuna á netinu og geta bæði skólar og einstaklingar unnið.

Framhaldsskólunum er skipt niður í fjóra riðla og er keppni í fyrsta riðlinum lokið. Menntaskólinn við Hamrahlíð var sigursæll í þeim riðli. Skólinn sendi inn besta vefsjónvarpsþáttinn og Hjalti Vigfússon, nemandi skólans, átti besta slagorðið: „ekki leggja líf þitt í hendur, þess sem er kenndur.“ Þá átti Sindri Benediktsson bestu ljósmyndina. „Það myndaðist ákveðin stemning innan skólans og hópsins,“ segir Sindri. Hann segist viss um að keppni af þessu tagi hafi áhrif á ungt fólk. Hann sjálfur hafi tekið þátt bæði vegna boðskaparins og verðlaunanna sem voru í boði. „Keppnin var auglýst í skólanum af Umferðarstofu, ég ákvað bara að slá til, fékk lánaða myndavél og tók myndina.“

Ákveðið var að halda keppnina til að vekja athygli á því hversu algeng alvarleg umferðarslys eru hjá ungu fólki. Það sem af er ári hafa þrír sautján ára drengir látist í umferðarslysum.

Þóra Magnea Magnúsdóttir, fræðslufulltrúi hjá Umferðarstofu, segir að framhaldsskólanemar séu einstaklega frjóir og hugmyndaríkir, líkt og sjáist af þátttöku þeirra í keppninni. „Öll þessi slagorð og myndir og myndbönd eru rosalega flott og þessu hefur verið mjög vel tekið.“ Ætlunin er að fá ungt fólk til að tala við annað ungt fólk í stað þess að ávallt séu fullorðnir að segja þeim til. „Þetta eru þeirra raddir, orðfæri og skilaboð.“thorunn@frettabladid.is