Bæjarstjórn Ölfuss mótmælir vegtollum

Bæjarstjórn Ölfuss mótmælir harðlega öllum hugmyndum um vegatolla á Suðurlandsveg. Bæjarstjórnin bókaði um málið á fundi þann 30. desember síðastliðinn þar sem segir að auknar álögur á íbúa og atvinnulíf á Suðurlandi í formi vegatolla muni hafa verulega neikvæð áhrif á búsetu, atvinnustig, fasteignaverð, einstaklinga og fyrirtæki á Suðurlandi.

„Nú þegar greiða allir bifreiðaeigendur skatta til ríkisins í formi bifreiða- og eldsneytisgjalda. Með upptöku veggjalda er klárlega verið að tvískatta notendur umræddra vega á meðan aðrir landsmenn greiða ekki sérstaklega fyrir úrbætur á vegakerfinu," segir einnig og bæjarfulltrúarnir bæta við að slíkt sé algjörlega óásættanlegt. Slíkt brjóti gegn jafnræði íbúa þessa lands „og er í beinni andstöðu við áform sem kynnt hafa verið í áætlunum ríkisstjórnarinnar um uppbyggingu á sterku höfuðborgarsvæði."

Þá bæta þeir við að aukinn kostnaður við ferðir milli Suðurlands og höfuðborgarsvæðisins muni leiða til þess að íbúar og fyrirtæki á Suðurlandi sæki í minna mæli atvinnu, þjónustu og verkefni á höfuðborgarsvæðinu. „Það mun leiða til aukins atvinnuleysis á svæðinu og lækkandi fasteignaverðs".