Heimilislegt að sofa með riffil við hliðina á rúminu

Strákarnir í Diktu hafa verið á ferðalagi um Þýskaland síðustu daga. Áhorfendur hafa látið þá vita hvernig staðan er í leikjum íslenska landsliðsins og staðalbúnaður hótelherbergja í Hollandi kom skemmtilega á óvart.

„Stemningin er mjög góð. Ég get ekki sagt annað,“ segir Jón Þór Sigurðsson, Nonni kjuði, trommuleikari hljómsveitarinnar Diktu.

Dikta er nú á tónleikaferðalagi um Þýskaland og var í Stuttgart þegar Fréttablaðið náði í Nonna. Hann segir ferðina hafa verið góða þótt ýmislegt sé öðruvísi á meginlandi Evrópu en á Íslandi – staðal­búnaðurinn í einu hótelherberginu var til að mynda skotvopn. „Við vorum að spila í Þýskalandi, en hótelið okkar var hinu megin við landamærin, í Hollandi,“ segir Nonni. „Það var riffill við hliðina á rúminu mínu á hótelinu. Mjög eðlilegt, en heimilislegt engu að síður.“

Nonni er góð skytta, en eins og Fréttablaðið greindi frá á dögunum lenti hann í öðru sæti á landsmótinu í enskum riffli fyrir hönd Skotfélags Kópavogs. „Ég er annáluð skytta, en það var svo sem ekki gert meira í því en að hafa riffilinn við hliðina á rúminu. Okkur fannst þetta mjög fyndið.“

Dikta kemur fram á 200-300 manna stöðum í Þýskalandi og hefur mætingin að sögn Nonna farið fram úr björtustu vonum. Tónleikarnir hafa farið fram á svipuðum tíma og leikir íslenska landsliðsins á HM í Svíþjóð, en áhorfendur hafa verið duglegir við að láta meðlimi hljómsveitarinnar vita hver staðan er í leikjunum. Þá eru hundruð platna sem teknar voru með til að selja uppseld.

Hljómsveitin kom fram í Frankfurt í gær. Hún fer svo til Bretlands og kemur fram í London í kvöld. „Við erum svo að hugsa um að kíkja á fótboltaleik í Portsmouth – kíkja á Hemma Hreiðars og félaga,“ segir Nonni. Portsmouth glímir við Leeds á laugardaginn, en Nonni er einnig með háleitar hugmyndir um að glíma við Hermann Hreiðarsson. „Ég hef verið valinn til að taka á Hemma. Það er spurning hvernig það fer, en hann er náttúrlega orðinn gamall.“

Hefurðu eitthvað í hann? „Ég veit það ekki. Ég er mjög spenntur að sjá hvað gerist.“

atlifannar@frettabladid.is