Á toppnum á tveimur stöðum

„Maður vonaði alltaf að það kæmi fólk að sjá myndina en ég bjóst ekki við að þetta gengi svona vel strax,“ segir Reynir Lyngdal, leikstjóri Okkar eigin Osló.

Gamanmyndin er í efsta sæti yfir aðsóknarmestu myndir landsins með rúma 14.400 áhorfendur þrátt fyrir að hafa aðeins verið sýnd í tæpar þrjár vikur. Titillag myndarinnar í flutningi Valdimars Guðmundssonar og Memfismafíunnar er sömuleiðis efst á vinsældarlista Rásar 2 og er Okkar eigin Osló því á toppnum á tveimur stöðum samtímis.

„Þetta er lítil og sæt saga, lítill sólargeisli. Hún fjallar um meingallað fólk sem meinar vel og fólk vonandi finnur sjálft sig í þessu fólki,“ segir Reynir, sem ætlar að leikstýra annarri gamanmynd með sama hópi og gerði Okkar eigin Osló og er Þorsteinn Guðmundsson þegar byrjaður að skrifa handritið.

Til stendur að sýna Okkar eigin Osló í Noregi, enda eru norskir meðframleiðendur að henni og líklega verður það síðar á þessu ári. Einnig er verið að vinna í að sýna hana á kvikmyndahátíðum erlendis.

Reynir er með tvær aðrar myndir í bígerð en óvíst er hvenær þær verða tilbúnar. Annars vegar mynd eftir bók Auðar Jónsdóttur, Fólkinu í kjallaranum, og hins vegar mynd eftir draugasögu Gerðar Kristnýjar, Garðurinn, eins og Fréttablaðið hefur áður greint frá.

Reynir vinnur handritið að Fólkinu í kjallaranum með eiginkonu sinni Elmu Lísu Gunnarsdóttur. Líklega mun Ólafur Egilsson, sem annast leikgerð verksins í Borgarleikhúsinu, verða þeim innan handar. -fb