Féll fyrir Ósló en lögð inn á spítala í Malmö

Söngkonan Rihanna tróð upp í Ósló um helgina, en meðal áhorfenda var meðal annars norska krónprinsessan Mette-Marit og sonur hennar Maríus. Rihönnu líkaði dvölin í höfuðborg Noregs vel og hrósaði áhorfendum sérstaklega að tónleikum loknum á samskiptavefnum Twitter. „Takk fyrir móttökurnar Ósló. Þið létuð mér líða eins og heima hjá mér."

Norskir aðdáendur söngkonunnar bjuggust við að hún léti sjá sig úti á lífinu eftir tónleikana en Rihanna eyddi frekar nóttinni í hljóðveri ásamt norsku framleiðendunum Stargate.

Rihanna áætlaði ekki að segja skilið við Skandinavíu og voru þrennir tónleikar í viðbót á dagskrá hjá henni. Tónleikarnir í Malmö í Svíþjóð í gærkvöldi voru aftur á móti felldir niður eftir að söngkonan ver lögð inn á sjúkrahús með flensu.

Þetta kom fram í viðtali hér á Vísi við Hildi Guðný Káradóttur háskólanema en hún og vinkonur hennar ferðuðust langar leiðir á tónleikana.

Í gærkvöldi var síðan tilkynnt að Rihanna muni halda aðra tónleika í Malmö en ekki var sagt nánar hvenær það verður. Þá bað söngkonan aðdáendur sína afsökunar á Twitter-síðu sinni í gær.