Sagðist hafa verið neyddur til þess að selja fíkniefni

Fimmtugur karlmaður var dæmdur í átján mánaða óskilorðsbundið fangelsi í Héraðsdómi Norðurlands eystri í gær fyrir stórfellt fíkniefnalagabrot.

Maðurinn, sem sjálfur var mjög háður fíkniefnum, var meðal annars sakfelldur fyrir að hafa frá árinu 2006 til 2010, tekið við af ónafngreindum manni samtals eitt kíló af amfetamíni og 400 grömm af hassi.

Þá er maðurinn einnig dæmdur fyrir að rækta kannabisplöntur og áfengislagabrot. Maðurinn hefur ekki komist í kast við lögin áður.

Hann sagðist hafa lent í fjárhagserfiðleikum árið 2006 og þá fengið háar fjárhæðir lánaðar frá ónafngreindum aðilum sem hann gat ekki endurgreitt. Hefði hann vegna þvingana því farið að selja fíkninefni.

Manninum er talið til tekna að hann hefur sótt meðferð vegna fíknar sinnar.