Borgarstjórinn benti mótmælendum á að fá leyfi fyrir tjöldum

„Við bentum þeim á að fá leyfi," segir Björn Blöndal, aðstoðarmaður Jóns Gnarr, borgarstjóra Reykjavíkurborgar, þegar hann er spurður út í Occupy-mótmælin á Austurvelli.

Lögreglan hefur núna tvívegis skipað mótmælendum að fjarlægja tjöld sem þeir tjölduðu á Austurvelli. Í morgun voru um fjögur tjöld og tíu mótmælendur sem þar stóðu.

Vandamálið er að mótmælendur mega ekki tjalda nema með leyfi garðyrkjustjóra, og svo virðist sem borgaryfirvöld hafi bent mótmælendum á það. Aftur á móti er ekki amast við að mótmælendur taki sér stöðu á Austurvelli.

Þess má geta að Jón Gnarr tók sjálfur þátt í Occupy-mótmælunum á Wall Street í New York sem hafa staðið yfir síðan í september.

Ekki náðist í borgarstjórann vegna málsins, en hann situr núna á fundi borgarstjórnar.