Hjólreiðamenn harma slysið á Dalvegi

Landssamtök hjólreiðamanna harma hið hræðilega slys sem varð á Dalvegi í Kópavogi miðvikudaginn 19. október síðastliðinn samkvæmt tilkynningu sem þeir sendu fjölmiðlum.

Þar segir að hugur félagsmanna og allra þeirra sem hjóla er með hinum slasaða og aðstandendum hans.

Svo segir orðrétt: „Ábyrgð ökumanna vélknúinna ökutækja er mikil. Þeir geta hæglega valdið stórslysi eða bana með ógætilegum akstri. Mikilvægt er að ökumönnum sé gerð grein fyrir ábyrgð sinni á öllum stigum. Bílstjórar þurfa alltaf að gæta að umferð hjólandi á götu eða stíg, sérstaklega áður en þeir taka hægri beygju."

Víða háttar svo til að göngu- og hjólastígar þvera akbrautir og inn- og útkeyrslur. Mikilvægt er að allar þveranir verði gerðar sem öruggastar segir í tilkynningunni.

Þar segir að til dæmis megir mála yfirborð stíga yfir þveranir, láta stíga þvera akbraut á upphækkun, taka af óþarfar inn- og útkeyrslur eða færa stíga á öruggari stað.

Bent skal á leiðsögn í leiðbeiningum um „Hönnun fyrir reiðhjól" (pdf 7,4 mb) frá Reykjavíkurborg og Eflu verkfræðistofu til að hönnun fyrir reiðhjól verði sem öruggust.