FIFA: Ekki á dagskránni að halda HM 2022 í Katar um vetur

Alþjóðaknattspyrnusambandið, FIFA, segir að það sé ekki á dagskrá á að færa til,heimsmeistarakeppnina í Katar 2022, þannig að hún verði spiluð um vetur. Alþjóðlegu leikmannasamtökin höfðu lagt þetta til þar sem hitinn er mikill í Katar yfir sumarið og margir úr knattspyrnuforustunni höfðu líka tekið vel í þessa hugmynd.

„Eins og staðan er núna þá er engin áætlun í gangi um að færa til keppnistímabilið. Allar tillögur um breytingar á tímasetningu heimsmeistarakeppninnar verða að koma frá gestgjöfunum sjálfum og þurfa að fara fyrir framkvæmdanefnd FIFA," sagði í tilkynningu frá FIFA.

Þessi tilkynning kemur þvert á orð Sepp Blatter, forseta FIFA, fyrr í þessum mánuði sem sagðist þá búast við því að keppnin færi fram um vetur. Michel Platini, forseti UEFA, gekk reyndar enn lengra og lagði til að fleiri Persaflóaríki fengu að hýsa leiki í keppninni.

Katarmenn eru hinsvegar harðir á því að halda keppnina sjálfir og að halda hana um sumar. Þeir segjast ætla að vera með allt klárt þegar keppnin fer fram í júní og júlí þótt að hitastigið geti farið upp í 50 gráður á selsíus.