Kynntir sem Dikita frá Írlandi

Hljómsveitin Dikta lenti í skondnu atviki á tónlistarhátíðinni Euro­sonic í Hollandi á dögunum. Þá var hún kynnt upp á svið sem hljómsveitin Dikita frá Írlandi.

„Við hlógum mikið að þessu,“ segir trommuleikarinn Jón Þór Sigurðsson, eða Nonni kjuði. Sérstaklega þótti þeim fyndið að stúlkan sem kynnti þá hafði skömmu áður komið til þeirra og spurt hvernig hún ætti að kynna þá. Þeir sögðust einfaldlega heita Dikta og kæmu frá Íslandi og brást hún þá við með því að segja: „Segið mér eitthvað sem ég veit ekki“.

„Svo klúðraði hún þessu gjörsamlega, greyið stelpan,“ segir Nonni og hlær. „Hún var reyndar mjög sorrí yfir þessu eftir á. Við gerðum mikið grín að þessu þegar við vorum að spila og sögðumst vera Dikita frá Írlandi.“

Nafnið Dikta hefur vafist fyrir fleiri útlendingum og sumir ruglast á hljómsveitinni og bandarískum ruðningsþjálfara sem heitir Mike Ditka. „Menn hafa stundum ruglað þessu saman en við höfum bara húmor fyrir því,“ segir Nonni.

Fram undan hjá Diktu er spilamennska á tónlistarhátíðinni South By Southwest í Texas í mars. Skömmu áður spilar sveitin í Los Angeles á nokkrum tónleikum. Í maí fer Dikta síðan á tónleikaferð um Þýskaland, Austurríki, Sviss og Danmörku. Þar verður platan Get it Together kynnt, sem kemur út á vegum fyrirtækjanna Smarten-Up og Rough Trade í Evrópu 11. mars. - fb