Enn hlýtur Eldfjall verðlaun

Theódór Júlíusson var í fyrrinótt útnefndur besti leikarinn á kvikmyndahátíð í Sao Paulo fyrir leik sinn í Eldfjalli, kvikmynd Rúnars Rúnarssonar. Þetta er í annað sinn sem hann er verðlaunaður sérstaklega, en áður hafði kvikmyndahátíð Evrasíu í Kazakhstan veitt honum fyrstu verðlaun fyrir hlutverk sitt í myndinni. Sýning Eldfjalls í Sau Paulo markaði frumsýningu myndarinnar í S-Ameríku.

Eldfjall hefur hlotið dæmalaust góðar viðtökur og unnið til allnokkurra verðlauna. Fyrir viku hlaut Eldfjall aðalverðlaunin í Valladolid. Þá hlaut hún fyrir hálfum mánuði aðalverðlaunin, Gullna úlfinn, á kvikmyndahátíðinni í Montréal. Og helgina þar á undan hlaut hún silfurverðlaun á kvikmyndahátíðinni í Chicago.

Auk þess að vera í Sao Paulo, hefur myndin í þessari viku tekið þátt í keppni Vín og Denver, auk þess sem hún hefur verið sýnd á norrænum kvikmyndadögum í Lübeck.

Eldfjall er enn sýnd í íslenskum kvikmyndahúsum.