Colin Farrell ástfanginn af Keiru Knightley

Tveir af aðstandendum hinnar frábæru The Departed koma að gerð kvikmyndarinnar London Boulevard. Þetta eru handritshöfundurinn William Mon­ahan og framleiðandinn Graham King. Monahan situr einnig í leikstjórastólnum í þessari mynd sem skartar Colin Farrell, Keiru Knightley og sjálfum Ray Winstone í helstu hlutverkum.

Myndin er dæmigerður breskur krimmi, harðsoðinn og ofbeldisfullur. Hún segir frá glæpamanninum Mitchell sem ákveður að snúa baki við ránum og morðum eftir dvöl í fangelsi. Hann ræður sig sem lífvörð heillandi kvikmyndastjörnu og verður ástfanginn af henni. Fyrr en varir bankar fortíðin hins vegar upp á og vill fá sitt. - fgg