Bjóða vodka beint af sviðinu

Hin danskættaða hljómsveit Croisztans spilar á Bakkusi á föstudaginn. Þetta verða fyrstu tónleikar sveitarinnar hér á landi síðan í nóvember 2008 er hún steig á svið á gamla Grand Rokki við góðar undirtektir.

Croisztans spilar austur-evrópskt þjóðlagapönk, eða „vodkarokk", og var stofnuð í Kaupmannahöfn árið 1997. Tveir Íslendingar eru í bandinu og fjórir Danir. „Við erum í rosafínu formi. Við erum sjóðheitir og tilbúnir og ætlum að bjóða landsmönnum upp á smá vodka beint af sviðinu," segir söngvarinn Sigurður Óli Pálmason, sem býr í Kaupmannahöfn. Hann segir yndislegt að koma til Íslands og spila. „Ég á hérna tvö börn sem ég sinni annað slagið, þannig að ég er með annan fótinn hérna. Það er ekki verra að geta hent í smá gigg í leiðinni."

Sveitin er sæmilega þekkt í undirheimum Kaupmannahafnar, aðallega fyrir mjög líflega og orkumikla tónleika. Þeir halda því fram að þeir komi frá litlu austur-evrópsku ríki, Croisztan, sem berst fyrir sjálfstæði sínu. Sveitin er að undirbúa sína þriðju plötu og ætlar að spila lög af henni auk eldri laga á tónleikunum á Bakkusi. Þeir hefjast kl. 23 og er aðgangur ókeypis. - fb

Hér fyrir ofan má sjá myndband við lagið Snorri hver með Croisztans.