Myndasyrpa frá Hringrásarbrunanum

Mikill eldur gaus upp í stórri dekkjastæðu á athafnasvæði Hringrásar við Sundahöfn á þriðja tímanum i nótt og var allt slökkvilið á höfuðborgarsvæðinu kallað út auk manna á frívakt. Gríðar mikinn og svartan reyk lagði frá eldinum, en svo vel vildi til að vindur var suðaustlægur í nótt og lagði reykinn á haf út, en ekki yfir byggðina eins og gerðist í samskonar bruna á sama stað árið 2004. Þá þurftu á sjötta hundrað manns að yfirgefa heimili sín. Starfsmenn fréttastofu stóðu vaktina í nótt og í morgun og í meðfylgjandi myndaalbúmi má sjá myndir sem Vilhelm Gunnarsson, ljósmyndari Fréttablaðsins og Vísis, tók.

Ekki þurfti að rýma hús

Samhæfingastöð almannavarna í Skógarhlíð var mönnuð í nótt vegna brunans, en vegna hagstæðrar vindáttar var ekki almannavarnaástandi lýst yfir og ekki þurfti að rýma nein hús. Íbúar á Kleppsvegi hafa verið hvattir til að halda gluggum lokuðum þó svo að reyk leggi ekki yfir hverfið þar sem lyktarmengun er talsverð. Haft var samband við forráðamenn fyrirtækja á iðnaðarsvæðinu við Klettagarða og nágrenni og þeir hvattirtil að loka fyrir loftræstingu.

60 manna lið slökkviliðsins sprautaði mikilli kvoðu á eldinn og undir morgun kom slökkviliðsbíll frá Reykjavíkurflugvelli með viðbótar kvoðu, en slökkvibíll frá Keflavíkurflugvelli var sendur á Reykjavíkruflugvöll á meðan. Búið er að slökkva eldinn en búist er við að slökkviliðsmenn verði langt fram eftir morgni að drepa endanlega í glæðum.

Minni eldsmatur en í brunanum 2004

Jón Viðar Matthíasson, slökkviliðsstjóri, segir í samtali við Vísi að aðalástæða þess að mun betur gekk nú en fyrir fimm árum sé að eldsmatur hafi verið mun minni núna en var þá. Einnig sé búið að gera breytingar á svæðinu. Búið sé að steypa upp skilveggi á milli þeirra efna sem geymd séu á svæðinu.

Engan slökkviliðsmann sakað í aðgerðunum. Eldsupptök eru með öllu ókunn, en rannsókn getur ekki hafist af fullum krafti fyrr en að slökkvistarfi loknu.