Eldurinn hefur minnkað

Slökkviliðsmenn virðast hafa náð tökum á eldinum. Hann er miklu minni en hann var fyrr í morgun, segir Vilhelm Gunnarsson ljósmyndari Fréttablaðsins sem stendur vaktina við Hringrás í Sundahöfn. Þar kviknaði eldur um þrjúleytið í nótt. Eldurinn er á stað þar sem áður kom upp eldur árið 2004.

Slökkviliðsmenn eru komnir með sjódælur og froðu sem þeir nota til að berjast við eldinn. Þó er búist við því að slökkvistarf muni halda áfram eitthvað fram á daginn. Þykkan reykmökk leggur frá brunanum og yfir höfnina.

Allt tiltækt lið slökkviliðsins var kallað út um leið og eldurinn kom upp og var aukamannskapur kallaður til.