250 lítrar fóru á 45 mínútum

„Þetta gekk ljómandi vel - maður hefði getað verið með fleiri þúsund lítra af súpu og það hefði allt farið," segir Úlfar Eysteinsson, matreiðslumaður á Þremur frökkum, sem var einn af þeim sem gaf kjötsúpu á Skólavörðustígnum á þessum fyrsta degi vetrar.

Úlfar segir að í heildina hafi um fjögur þúsund manns fengið að bragða á kjötsúpum en yfir sex stöðvar voru staðsettar víða á Skólavörðustígnum. „Á minni stöð vorum við með 250 líltra og þeir fóru á þremur korterum," segir hann og áætlar að um þúsund manns hafi heimsótt básinn hans.

Einn potturinn fór inn í Hegningarhúsið sem stendur við götuna og segir Úlfar að fangaverðir og fangar hafi verið yfir sig ánægðir. „Það var mikið þakklæti í fólki og margir búnir að koma í fjögur til fimm ár. Mér finnst eins og allir séu að gefa súpu í dag, ég held að þetat geti orðið byrjunin á því að það verði kjötsúpa á þessum degi það sem eftir er, alveg eins og Sprengidagur og Bolludagur," segir Úlfar kátur að lokum.