Fékk sér plokkfisk og var færður til skýrslutöku

„Við vorum saman í mat þegar óeinkennisklæddir lögreglumenn komu að okkur," segir Jón P. Líndal, samstarfsmaður Ástþórs Magnússonar, sem var færður til skýrslutöku fyrir utan Byko í Kópavoginum í hádeginu.

Jón og Ástþór höfðu fengið sér plokkfisk í hádegismat þegar tveir óeinkennisklæddir lögreglumenn eiga að hafa gengið upp að þeim en sá þriðji beið í bifreið skammt frá.

Jón segir lögreglumennina hafa gefið upp erindi sitt og óskað eftir því að Ástþór kæmi með þeim á lögreglustöðina þar sem þeir ætluðu að taka skýrslu af honum vegna kæru sem Ástþór segir Hrein Loftsson hafa lagt fram, þegar hann var eigandi DV, vegna ummæla sem finna má á heimasíðunni Sorprit.com.

Ástþór neitar að svara því hvort hann tengist síðunni.

Í viðtali í síðustu viku á Vísi gagnrýndi Ástþór lögregluna fyrir að ganga erinda glæpamanna. Þá sagði Ástþór: „Er það eðlilegt að bankaræningjar og skósveinar þeirra gangi lausir á meðan þeir sem gagnrýna eru ofsóttir af lögreglunni? Ég ætla ekki að mæta í yfirheyrslu á meðan lögreglan vinnur svona."

Ástþór var boðaður í skýrslutöku 30. desember en mætti ekki í hana. Því var hann færður á lögreglustöðina í dag.

Jón sagðist ekki vita á hvaða lögreglustöð Ástþór var færður. Aðspurður hvort Ástþór hefði verið handjárnaður svaraði Jón því til að svo hefði ekki verið. Ástþór fór með þeim af fúsum og frjálsum vilja.