Á gjörgæslu eftir alvarlega líkamsárás

Karlmaður liggur á gjörgæsludeild Landspítalans eftir að hafa orðið fyrir alvarlegri líkamsrás í miðborg Reykjavíkur í morgun. Maðurinn sem er fæddur árið 1976 lenti í átökum við annan karlmenn í Hafnarstræti um hálf átta leytið. Átökunum lauk með því að sparkað var í höfuð mannsins með þeim afleiðingum að hann liggur nú sem fyrr segir á gjörgæsludeild.

Árásarmaðurinn er ófundinn en samkvæmt upplýsingum frá lögreglu hefur hún lýsingu á manninum undir höndum og vinnur nú að því að hafa uppi á honum.

Alls komu sex líkamsárásarmál upp hjá lögreglunni á höfuðborgarsvæðinu í nótt og í morgun. Fjórar árásanna áttu sér stað í í úthverfum borgarinnar í og við heimahús. Í flestum tilfellum var um minniháttar áverka að ræða.