Dansari sýnir leðurgrímur

Gunnlaugur Egilsson, dansari og danshöfundur, opnar sýningu á leðurgrímum sem hann hefur hannað í skartgripasmiðjunni Hringu á Laugavegi í kvöld.

Gunnlaugi er margt til lista lagt því auk dansins hefur hann lagt stund á leðurgrímumótun í nokkur ár. Hann hefur meðal annars hannað leðurgrímur fyrir dansverk sitt Djöflafúgu, sem Íslenski dansflokkurinn sýndi 2008.

Grímur Gunnlaugs hafa yfir sér annarlegan blæ en sjálfur segist hann sjá fegurðina í því ljóta og fá innblástur úr því sem er djöfullegt og óhugnanlegt.

Sýning Gunnlaugs í Hringu stendur til 28. desember.